غلام مصطفيٰ ڀنڀرو

غلام مصطفيٰ ڀنڀرو: اديب ۽ محقق غلام مصطفيٰ ولد واحد بخش ڀنڀرو 10 آڪٽوبر 1975ع تي ڳوٺ ٽيڀري ڀنڀرا، تعلقي ۽ ضلعي عمرڪوٽ ۾ ڄائو. ابتدائي، ثانوي ۽ اعليٰ ثانوي تعليم ٽيڀري ڀنڀرا، ڇور ۽ عمرڪوٽ مان حاصل ڪرڻ بعد سنڌ يونيورسٽي ڄامشوري مان 2002ع ۾ ايم. اي (مسلم هسٽري) ۽ 2004ع ۾ بي. ايڊ ڪئي. 1992ع کان پرائمري استاد آهي. ادب طرف سندس لاڙو شاگردي واري زماني ۾ ٿيو. 1998ع ۾ هن سماجي تنظيم ’مھراڻ ويلفيئر ايسوسيئشن‘ جو بنياد وڌو، جنھن جو پاڻ باني صدر پڻ رهيو. 2000ع ۾ پنھنجي ڳوٺ ۾ ’شھيد سورهيه بادشاهه ميموريل لائبرري‘ قائم ڪئي. سندس مضمون ۽ مقالا سنڌي رسالن ’جهونگار‘، ’منصور‘، ’الراشد‘ ۽ ’مھراڻ‘ اخبار ۾ ڇپجندا رهيا آهن. هن تاريخ، سياست، تصوف، پير پاڳاري ۽ حر تحريڪ جي موضوعن تي تحقيقي ڪم ڪيو آهي. سندس ڇپيل ڪتابن ۾: ’قائد اعظم جي مسلم ليگ، پاڪستان ۽ پير پاڳارو‘ (2018ع)، ’پير صاحب روضي ڌڻي ۽ پير صاحب تجر ڌڻي‘ (2020ع)، ’روهليءَ جو راڻو: ابراهيم فقير مست جيسلميري‘ (2021ع)، ’جواهرات مسڪين‘ (2021ع)، ’گوهر مھراڻ: حالات زندگي پير علي گوهر شاهه ’بنگلي ڌڻي‘، ٻيو پير پاڳارو‘ (2022ع) ۽ ’سيد السادات: حالات زندگي پير حزب الله شاهه، ٽيون پير پاڳارو‘ (2023ع) شامل آهن.

داخلا ۾ استعمال ٿيل تاريخون

1975.10.10  عيسوي

اديب ۽ محقق غلام مصطفيٰ ولد واحد بخش ڀنڀرو 10 آڪٽوبر 1975ع تي ڳوٺ ٽيڀري ڀنڀرا، تعلقي ۽ ضلعي عمرڪوٽ ۾ ڄائو.

اديب - ڀاڱي جون ٻِيون داخلائون